Alay para kay Susan Fernandez
(August 3, 1956-July 2, 2009)

Sa pagitan ng musika
Na napagod sa pagmamahal
At nagupo sa hapdi ng mga sugat,
At ng pusong umaawit
Nakabaon sa dibdib ang hapis

parang pagpasan ng krus sa semana santa,
hinahagod ko ang kumikirot
mong sugat na unti-unti sanang maghilom ngunit
higit na makirot nitong mga huling araw
ng mabangis na bagyo't talim ng kidlat
ng umuungol na mga bulkan
at dumadagundong na lindol
sana ay bumuka ang lupa
at lamunin ang aking pighati.

Sa pagitan ng musika
Na napagod sa pagmamahal
At nagupo sa hapdi ng mga sugat,
At ng pusong umaawit
Nakabaon sa dibdib ang hapis

parang pagpasan ng krus sa semana santa,
Hinahaplos ko ang mga latay
na di makita ng mga matang luhaan
sa ilalim ng aking balat
nakaguhit ang imahen ng nakaratay
sa katawang dumausdos mula
sa nawalang malay,
at di kita mahaplos maging sa kamalayang
Nakikiusap para sa konting pagmamahal

Sa panahon na saklot ng mga berdugong
Naka-patig, nakasukbit ng mga sandata
Nananalanta sa mga bukid at bundok
Nagpapaagos ng dugong pulahan sa pagdanak
At dumilig sa lupaing tigang sa hustisya:
Mga larawan ng mga inang halukipkip
Ang mga anak na humihigop ng
Alat ng instant noodles at sipong di mapahiran.
Sumisikip ang aking dibdib
Sa pagitan ng musika
At pusong nagmamahal
Ikaw ay nagupo sa hapdi ng mga sugat,

Sa panahong mailap ang lahat:
Tangan ng kapalaran ang kinabukasang
Di ko masalat sa hanging kumakaripas
Sa panahon ng tag-ulan at lampas baywang
Na tubig sa mga pamayanan
Tubig at dugong naghalo't nagliliyab
Sa sulo ng pagbabangon
Ng pag-asang kahit sa bagyo'y umuusbong
Sumisikip ang aking dibdib

Sa pagitan ng musika
Na napagod sa pagmamahal
At nagupo sa hapdi ng mga sugat,
At ng pusong umaawit
Nakabaon sa dibdib ang hapis.